今日开毕业生家长会，结果好夜同妈妈一齐返屋企，点知喺113上面发生咗件事，令到本来坐住都瞓着咗嘅小蚊吓醒咗：妈妈同小蚊咗喺巴士后门前面嘅双人位，小蚊瞓到模模糊糊嘅时候突然听到靠尾嘅位有人讲电话好大声，售票员又好紧张唔知讲咩，我仲唔知醒，妈妈推醒我之后行咗去后面，我拧转头发现有人瞓咗喺个位到呕白泡抽筋，先听清楚原来讲电话嘅系打畀120，售票员问有无人识点做，霎时之间就清醒晒，因为小蚊好清楚知道哩个人究竟发生紧咩事，嗰个人就系咁打畀120同佢报告我哋巴士位置，妈妈帮佢按住虎口又搽药油，小蚊拿拿声都行埋过去，摞咗书包只笔出来畀佢咬住，摞咗支水出来畀佢饮（唔使奇怪小蚊同妈妈点解知点做，好多朋友仔都知小蚊自细体弱多病，妈妈为咗照顾我，我又为咗照顾自己所以知道D医学常识未尝出奇...-_-|||）。目光本来好呆滞，突然间只眼珠转咗过来望住咗小蚊，虽然知道咁样代表佢有返知觉应该开心，但系畀佢咁样望一望，小蚊顿时觉得个心凉咗半截，因为个表情真系有D恐怖...见佢有反应小蚊问佢叫咩名，知唔知发生紧咩事，有无屋企人喺深圳，如果有事应该打畀边个，好得佢都识答，嗰位热心人士又即刻打电话帮佢联络。好唔容易等到120来到，医生抬咗佢上救护车事情先告一段落。当时车上面起码有二十多个人，但系有帮手嘅连埋小蚊、妈妈同售票员、司机一共得7个人，当佢无咩事嗰阵我望过车上面，打扮入时、相貌优雅嘅人唔少，个个都好似事不关己，己不劳心嘅样，原来有D人无论外貌系点都好个心唔靓畀人感觉都系好丑陋，我唔系赞紧自己有几伟大几热心助人，小蚊只系想讲：人注定有生老病死，但系你哋知自己几时有一日唔会好似哩个人咁坐坐下车发羊吊咩？有无谂过真系有哩一日如果周围嘅人对你都系冷眼旁观，由得你死，你会有咩感受？哩个社会真系太少好人，虽然哩个年代好多衰人就系利用好心来行骗，不过总会有人仲系愿意用万分之一嘅可能去赌，去相信世界上仲系有真正走头无路需要人帮助嘅人，廿一世纪嘅年轻人，希望你哋唔好继承上一代嘅冷血本性。

哎...气出完就要讲返开心嘅事，自上个几月前因为某D事小蚊同个F闹翻了，之后一直都无再讲嘢，星期四晚同嘉玲、师兄去咗恋恋，三个人始终都玩唔出咩样，金毛班人又喺pop in high紧，嘉玲就嗌咗嗰个F过来一齐玩，就系咁好似咩事都无发生过。哎..其实小蚊同佢系一类人，脾气臭又唔认输，过咗咁耐啊，咩都嬲完啦，但系两个都唔肯认衰仔讲嘢先咋嘛，没关系啦...没事就好～

pS：今日小蚊身心疲累吖.....