无错，今日要讲嘅就系哩部电影啦，有无人睇过啊？小蚊哩两星期都一直无时间去戏院，又唔甘心要喺屋企load翻版，终于星期三返咗屋企第二日赶喺落画之前去戏院睇啦！其实知道哩部戏都系因为有个星期坐370返屋企喺车到见到预告，睇完部戏我真系好唔明点解咁好嘅电影宣传咁弱？（还是系我而家out 咗唔知？）

『世贸中心』哩部电影系真人真事，以“911”事件做背景，几位警察喺世贸被飞机撞击后入内救人，大楼倒冧后只剩下两名警察生还嘅经历，周边嘅人感受、行动为主题。电影开始到结尾，我心情未有一刻系平静过，特别系世贸中心冧嗰时，好似设身处地咁感受到当时嘅恐惧，my god...有几咁难受，最后两位警察好坚强嘅求生意志，只不过曾经系海军陆战队嘅士兵喺消防员、警察等谂住放弃搜索嗰阵，再次著上军装同另一个救援人员走入好似废墟嘅世贸寻找生命，每一幕都有好深打击，每一句说话都会留低心酸嘅感觉。

记得2001年9月11日，发生哩件事嘅时候我仲喺初中，面对电视直播无太深感触，而家我只可以讲当年嘅我好无知，哩部电影好沉重，沉重到令我反思好耐。虽然个个都话导演喺哩部戏里面想表达“911”事件里面无英雄，每个人都系受害者。但喺我眼里面，所有人都系英雄，喺到小蚊由心咁向“911”事件嘅救援人员致敬。

『世贸中心』结尾： “911”事件中2749人不幸遇难，分别来自87个国家，其中有343名纽约消防员，84名政府公务人员，37名警察，23名纽约城市警察，可惜只有20人获救。两位男主角系20位获救者嘅第18、19个。