上次话你走咗只系话你返咗学校，无谂到今次你真系离开咗..

亲手结束咗我哋之间嘅感情，2005年12月25日－2007年9月7日，一年零八个月，虽然我哋一齐并无咁耐，只系我生活里面有你存在嘅时间，有D嘢真系好神奇，原来我哋06年嘅6月7号分手，今次依然喺7号哩日分手。讲唔出而家咩感觉，个天同我开咗个好大嘅玩笑，当毕业典礼嗰日喺草莓我决定一心一意做你好朋友嘅时候，你选择返来我身边，到我想好好同你一齐嗰阵，你选择咗离开。或者系我唔应该太软弱，点解嗰日会谂起你，会嗌你出来？如果我睇完病就返屋企，又或者一开始我无上过月影，唔咁想做师姐，今日我哋会变成点？我而家唔敢再同你做朋友，好心痛，我怕放唔低，可能到有一日我可以好坦然咁面对你，你还记得我嗰阵我哋仲系朋友，但系而家我做唔到..记唔记得，已经系第二次同你讲唔好再做朋友了，当时系见到你为咗宝仪伤心，我唔想再傻落去，其实而家谂返起我几羡慕宝仪，因为佢至少可以令你喺其他人面前表露出来你在乎佢。

真系好残忍，我哋竟然喺圣诞节嗰日开始，注定以后无论我几努力去忘记你，每年始终有一日要谂起你。好遗憾今年嘅圣诞唔可以再同你一齐过了，哩个曾经期待咗好耐有好多意义嘅圣诞节。

上次只系讲过曾经去过你屋企楼下，你好肯定咁话系我同高中男朋友一齐嗰阵嘅事，但系无话你知其实系同你分手无几耐之后，宝路有一晚来揾我去饮嘢，当去到留医部个十字路口等红绿灯嗰阵我话想去周围兜下，佢就车咗我去你楼下，咩都无讲就畀我喺车到喊，嗰阵好庆幸有个咁了解我嘅朋友，可惜而家连宝路都唔喺我身边了..

我同你自己都唔清楚你系唔系中意我，不过我明白你返来系对我嘅内疚，将来你遇到一个你好中意嘅女仔，你可以为佢做任何事嗰阵，你就会明白我讲“中意一个人系唔会计较付出咗几多”嘅意思。好多谢你为我所做嘅一切，而家谂起，好开心都好感动，虽然我哋唔可以走到最后，毕竟我哋都努力过，我相信我哋都系适合对方嘅人，可惜喺错嘅时候遇上。你成日觉得畀唔到我幸福，觉得自己做得唔够，其实你一句“为咗我心爱嘅人”，一次静静咁坐喺我身边我就已经觉得好幸福。我好中意你，但系我唔希望你再勉强自己，正如你唔希望畀唔到幸福我咁，所以我噚晚先有勇气去问你，我话唔会喺你面前喊，好开心我做到了，可能你又会觉得系我对感情唔再睇重，你确定么？上次你问完我哩句说话就收咗线，我唔出声只系因为我喺到喊，我唔明点解你会咁谂，你错了，系我太睇重先唔想畀压力你，我想尽可能做好应该做嘅事，点知反而令你有更大心理负担。大个咗拍拖真系好难，我已经唔知应该点做先系啱。

天使与魔鬼我带唔到了，不过如果下辈子有机会遇到你，我仲系愿意同你一齐。