今晚有人同我倾咗好耐，同佢7年嘅嗰个女仔，差唔多要分手了。7年，系一个咩概念？一世人究竟有几多个7年？我同宝路识咗7年，住咗喺而家哩个屋企14年，小雯东少陪咗我21年，已经谂唔出仲有咩了，其实真系无几多个7年噶..一开始我仲以为经历有D相似，因为佢同女朋友分手过，性格都同我曾经嘅嗰个佢一样表面开朗，实质上好抑郁，甚至连一齐返嘅原因都系因为放唔低，最后发现最大嘅区别，佢放唔低系因为中意个女仔。佢话“我今年27岁了，女朋友细我一年，我而家连自己都养唔到，唔好话结婚，佢拖唔起。”听到好心酸，如果系其他人同我讲拖唔起个女仔要分手我一定觉得系籍口，或者好似佢哋咁中意对方我都会劝佢留低个女仔，可惜现实摆喺眼前嗰阵，我咩都讲唔出..其实应该话我本来就好笨，唔识安慰人哋，睇到佢咁仲加唔识讲，可以做嘅只系借耳仔畀佢..老实讲嗰句，而家男人讲嘅嘢我信一半，承诺我更加只系信三分之一，但系会为咗感情留眼泪嘅我揾唔到理由唔信佢。哎..做咩搞到好似拍电影咁喈？如果系拍电影可唔可以畀个好D嘅结局佢哋？
